Արցախի արտաքին գործերի նախարարը հանդիպել է Հայաստանի արտաքին գործերի նախարարի հետ

09.10.2017

Հոկտեմբերի 7-ին աշխատանքային այցով Երևանում գտնվող Արցախի Հանրապետության արտաքին գործերի նախարար Մասիս Մայիլյանը հանդիպել է Հայաստանի Հանրապետության արտաքին գործերի նախարար Էդվարդ Նալբանդյանի հետ:

Ողջունելով Մասիս Մայիլյանին՝ Էդվարդ Նալբանդյանը շնորհավորել է նրան Արցախի արտաքին գործերի նախարարի պաշտոնը ստանձնելու կապակցությամբ՝ հաջողություն մաղթելով այդ կարևոր ու պատասխանատու առաքելության մեջ:

Կողմերը կարևորել են Արցախի և Հայաստանի արտաքին գործերի նախարարների միջև պարբերական հանդիպումների անցկացումը և կարծիքների փոխանակումը:

Զրուցակիցները հանգամանալից քննարկել են ադրբեջանա-ղարաբաղյան հակամարտության խաղաղ կարգավորման գործընթացին առնչվող հարցեր, մտքեր փոխանակել ԵԱՀԿ Մինսկի խմբի համանախագահների հետ ունեցած հանդիպումների վերաբերյալ:

Նախարարներն արծարծել են Արցախի և Հայաստանի արտաքին քաղաքական գերատեսչությունների միջև համագործակցությանն առնչվող հարցեր:

Print Friendly, PDF & Email