ԼՂՀ Նախագահը հանդիպել է ԵԱՀԿ գործող նախագահին
Փետրվարի 16-ին Լեռնային Ղարաբաղի Հանրապետության /Արցախի Հանրապետության/ Նախագահ Բակո Սահակյանը Երեւանում հանդիպում է ունեցել ԵԱՀԿ գործող նախագահ, Ղազախստանի Հանրապետության պետական քարտուղար, արտաքին գործերի նախարար Կանատ Սաուդաբաեւի հետ:
ԼՂՀ Նախագահի աշխատակազմի տեղեկատվության գլխավոր վարչության տեղեկատվության համաձայն, հանդիպման ընթացքում կողմերը քննարկել են ադրբեջանա-ղարաբաղյան հակամարտության կարգավորմանն առնչվող հարցեր:
Բարձր գնահատելով ԵԱՀԿ ջանքերը ադրբեջանա-ղարաբաղյան հակամարտության կարգավորման գործում` ԼՂՀ Նախագահն ընդգծել է, որ պետք է վերականգնել ԵԱՀԿ Բուդապեշտյան գագաթաժողովում հաստատված բանակցային ձեւաչափը: Նա նշել է, որ առանց ԼՂՀ անմիջական մասնակցության անհնար է հասնել հակամարտության լիարժեք կարգավորման: Բակո Սահակյանը մեկ անգամ եւս համոզմունք է հայտնել, որ հիմնախնդիրն ունի միայն խաղաղ հանգուցալուծում, եւ Ադրբեջանի ոչ կառուցողական դիրքորոշումը հանդիսանում է այդ գործընթացի ամենամեծ խոչընդոտներից մեկը:
Արցախի Հանրապետության Նախագահը կարեւորել է ԵԱՀԿ գործող նախագահի Արցախ այցելելու եւ տեղում երկրին ծանոթանալու անհրաժեշտությունը:
Հանդիպմանը մասնակցում էր ԼՂՀ արտաքին գործերի նախարար Գեորգի Պետրոսյանը:
Լեռնային Ղարաբաղի Հանրապետություն
Հեռ: (+374 47) 9 44087,
Ֆաքս: (+374 47) 9 71551, Web: www.nkr.am
Ստեղծված է Ghazanchyan.com